Donald Trump, fyrrum Bandaríkjaforseti, er á fullu að vinna að því að vera aftur kjörinn forseti Bandaríkjanna, þann 5. nóvember á þessu ári. Hann heldur kosningafundi í gríð og erg á milli þess sem hann skýst í réttarsal til þess að svara fyrir hin ýmsu dómsmál sem höfðað hafa verið gegn honum.
Ræða Trump á kosningafundi í New Jersey um helgina hefur vakið talsverða eftirtekt en þar hrósar hann hinum „látna en frábæra (e. late and great)“ Hannibal Lecter. Eflaust kannast hvert mannsbarn við hinn ógnvekjandi mannæturaðmorðingja sem fyrst vakti heimsathygli í túlkun sir Anthony Hopkins í stórmyndinni Silence of the Lamb auk framhaldsmynda. Það er þó nýlunda að raðmorðinginn skáldaði fái hrós.
„Hannibal Lecter er dásamlegur maður, hann fær fólk oft í mat,“ sagði Trump en ummælin lét hann falla eftir að hafa fullyrt að önnur lönd væru að senda fanga og vistmenn geðsjúkrahúsa til Bandaríkjanna.
Virtist Trump vera að ýja að því að menn á borð við mannæturaðmorðingjann væru að flytjast til Bandaríkjanna.
„Það er eins gott að við vinnum þessar kosningar. Annars er landið okkar búið að vera,“ hrópaði Trump við húrrahróp stuðningsmanna sinna.
