Í nýrri rannsókn þeirra kemur fram að þeir hafi gert tilraunir á músum með þessari nýju tækni. Þeir bjuggu til bóluefni sem kennir ónæmiskerfinu að ráðast ekki aðeins á eina tegund kórónuveiru, heldur átta mismunandi afbrigði hennar og þar á meðal afbrigði sem eru ekki enn til.
Rory Hills, aðalhöfundur rannsóknarinnar, segir að hún snúist um nýtt nanóagnabóluefni sem búi yfir óvenjulegum eiginleikum. Rannsóknin hefur verið birt í vísindaritinu Nature.
Ein af stóru áskorununum í heimsfaraldri kórónuveirunnar var að veiran stökkbreyttist sí og æ og ný afbrigði komu fram á sjónarsviðið. Það gerði að verkum að bóluefnin gátu ekki komið í veg fyrir smit.
Þetta þýddi að vísindamenn urðu hvað eftir annað að „uppfæra“ bóluefnin svo þau kæmu að gagni gegn nýjustu afbrigðunum.
Til að leysa þetta vandamál hafa vísindamennirnir við Cambridge University unnið að því sem þeir kalla „forvirka bóluefnatækni“. Það er að segja að þróa bóluefni áður en það er þörf fyrir þau.
„Þetta er skref í áttina að markmiði okkar um að þróa bóluefni gegn heimsfaraldursógnum, áður en þær geta sýkt fólk,“ segir Rory Hills í grein í The Conversation.
Venjuleg bóluefni innihald oft einn mótefnavaka. Mótefnavaki er einhverskonar fingrafar af veiru. Hann stefnir líkamanum ekki í hættu en getur kennt ónæmiskerfinu að ráðast á slíkar veirur. Rory Hills segir að í nýja bóluefninu séu átta mismunandi mótefnavakar frá átta mismunandi veirum.
