Sjónvarpskonan Oprah Winfrey hefur beðið aðdáendur sínar formlega afsökunar á því að hafa allan sinn sjónvarpsferil tekið þátt í megrunariðnaðinum og haldið fjölmörgum mismunandi megrunarleiðum að aðdáendum sínum í gegnum tíðina.

Afsökunarbeiðni Opruh, sem er sjötug að aldri, kom fram í þriggja klukkustundaþætti af Weightwatchers sem var í beinni útsendingu síðastliðinn fimmtudag.

„Ég hef verið virkur þátttakandi í megrunariðnaðinum,“ sagði Oprah og að slíkur áróður hafi dunið á áhorfendum hennar í gegnum sjónvarpsþætti hennar, tímaritaútgáfu og netsíður.

Sagðist hún sérstaklega sjá eftir tilteknu atriði þegar kerra með um 30 kílóum af fitu var trillað á svið í sjónvarpsþætti hennar. Átti fitan að tákna þá þyngd sem Oprah hafði sjálf misst á mánaðarlöngum djúskúr sem hún undirgekkst.

„Ég sendi út þau skilaboð að það að svelta þig og innbyrða vökva væri í lagi,“ sagði Oprah full eftirsjár og baðst afsökunar á framferði sínu í gegnum árin.

Nýlega opnaði sjónvarpsstjarnan sig um að hafa misst tæp 20 kíló á megrunarlyfinu vinsæl Ozempic en áður hafði hún gagnrýnt slík lyf sem hálfgert svindl. Sagði hún í þættinum hafa snúist hugur varðandi lyfið og að hún ætlaði hér eftir ekki að gagnrýna nokkurn mann fyrir ákvarðanir sem teknar væru til að bæta heilsu sína og líðan.