Íþróttavikan kemur út alla föstudaga á 433.is og á Hringbrautarrás Sjónvarps Símans. Helgi Fannar Sigurðsson og Hrafnkell Freyr Ágústsson hafa umsjón með þættinum.

Það kom flestum í opna skjöldu þegar fréttir bárust af því að Óskar Hrafn Þorvaldsson hefði sagt upp störfum sem þjálfari Haugesund í Noregi. Þetta var auðvitað tekið fyrir í þættinum.

„Þetta var bara sjokkerandi, ég bjóst bara alls ekki við þessu. Ég hélt að hann yrði lengi þarna og að þetta tæki tíma,“ sagði Hrafnkell.

Samkvæmt TV2 vildi Óskar taka með sér sinn eigin aðstoðarmann þegar hann tók við á sínum tíma en fékk það ekki í gegn. Sancheev Manoharan var því honum til aðstoðar. Greinandi var þá Paul André Farstad og markmannsþjálfari Kamil Rylka.

Á Óskar að hafa verið mjög ósammála hinum þjálfurunum er kom að fótboltanum sem Haugesund átti að spila.

„Ég held að þetta hafi ekkert endilega þurft að vera einhver Íslendingur. Ég held að Óskar sé það djúpur að þetta hafi þess vegna getað verið einhver í Noregi sem hann var búinn að finna og vildi fá með sér,“ sagði Hrafnkell.

„Það hefur greinilega verið ósætti í einhvern tíma en það sem mér finnst skrýtið er að það hafi ekki verið hægt að grípa inn í þetta á undirbúningstímabilinu.“

Nú er spurning hvað Óskar gerir næst en því var velt upp hvort hann gæti komið til Íslands.

„Ég held að rétta skrefið væri Valur eða KR. Ég held hann sé ekki að fara aftur í Breiðablik og hann er aldrei að fara í Víking.“

Helgi tók til máls og telur að KR-ingum þyki sennilega freistandi að fá Óskar heim.

„Eftir þetta eru menn í Vesturbænum kannski til í að sjá ástæðu fljótlega til að láta hann fara og fá Óskar inn.“

Umræðan í heild er í spilaranum.