Bílastæðaþjónustan Base Parking, sem hefur þjónustað farþega á Keflavíkurflugvelli með langtímastæði fyrir bíla þeirra, virðist vera sigld í strand. Má ráða það sérstaklega af nýju heiti félagsins, en það heitir núna „Siglt í strand ehf.“

Þetta sést með óhyggjandi hætti við flettingu í fyrirtækjaskrá Ríkisskattstjóra. Þar skilar „Base Parking ehf.“ engri niðurstöðu en sé kennitala fyrirtækisins slegin inn kemur upp „Siglt í strand ehf.“ – Forráðamaður fyrirtækisins er skráður Geir Þorsteinsson, maður úr Vestamannaeyjum, skal þess getið að hann tengist málefnum knattspyrnu ekki með nokkrum hætti. Eigandi Base Parking var hins vegar Ómar Þröstur Hjaltason.

DV hefur hvorki náð í Geir né Ómar við vinnslu þessarar fréttar. Þegar hringt er í uppgefið símanúmer fyrirtækisins hljómar tilkynningin „Í augnablikinu næst ekki í farsímann.“

Svo virðist þó sem enn sé hægt að panta bílastæðaþjónustu á vef Base Parking.

Orðspor Base Parking hefur lengi verið litað kvörtunum viðskiptavina, m.a. vegna óleyfilegrar notkunar starfsmanna fyrirtækisins á bílum sem eru í stæðaþjónustu hjá fyrirtækinu, einnig vegna slæmrar meðferðar á bílum. Undanfarið hafa verið brögð að því að viðskiptavinir fyrirtækisins hafi verið tvírukkaðir fyrir stæði þar sem bílum þeirra hefur verið lagt á stæðasvæði Isavia og eigendur því fengið tvöfalda rukkun, bæði frá Isavia og Base Parking.