Það er eitrað andrúmsloft á meðal starfsfólks á æfingasvæði Manchester United eftir harða gagnrýni Sir Jim Ratcliffe, nýs hluthafa í félaginu. The Sun fjallar um málið.

Ratcliffe og fyrirtæki hans INEOS eignuðust nýlega um fjórðungshlut í United og tóku yfir knattspyrnuhlið rekstursins. Á dögunum sendi hann tölvupóst til allra starfsmanna þar sem hann lýsti yfir vonbrigðum í kjölfar þess að hafa farið yfir aðstöðuna hjá United.

„Mér var því miður brugðið á mörgum stöðum yfir hversu óhreint það var. Sérstaklega hjá upplýsingatæknideildinni, sem var til skammar. Ekki voru búningsklefar U18 og U21 árs liðanna mikið skárri,“ sagði meðal annars í póstum Ratcliffe.

Sagði hann að enginn myndi komast upp með þetta hjá INEOS, en þessi gagnrýni hefur ekki fallið vel í kramið á meðal starfsfólks United ef marka má The Sun.

Á upplýsingatæknideildinni vinnur ungt fólk sem er á meðal þeirra lægst launuðu hjá United. Starf þeirra er fremur krefjandi og þessi gagnrýni Ratcliffe fór því öfugt ofan í starfsmennina þar. Líður þeim eins og þau hafi verið gerð að blórabögglum fyrir myn stærra vandamál innan félagsins.

Þá er ekki ánægja á meðal starfsmanna akademíunnar eftir ummælin um búningsklefa yngri liðanna. Andrúmsloftið er sagt eitrað vegna póstanna.

Þetta kemur allt saman í kjölfar þess að starfsmönnum var tilkynnt á dögunum að þau fengju ekki ókeypis miða á úrslitaleik enska bikarsins milli United og Manchester City þar sem var verið að skera niður kostnað. Skorið var niður á fleiri stöðum einnig.

Þá hefur Ratcliffe sett mætingaskyldu til fólks sem áður hafði svigrúm til að vinna heima hjá sér. Gerði hann þetta vegna reynslu sinnar af heimavinnandi fólki hjá INEOS. Það er þó ekki pláss fyrir alla starfsmenn og ákvörðunin því allt annað en vinsæl.