Steinunn Ólína Þorsteinsdóttir, lofar íslensku þjóðinni að hún mun sem forseti aldrei staðfesta nein lög sem varða auðlindir eða náttúru og lífríki Íslands. Hún telur það vera grundvallaratriði að þjóðin sjálf taki ákvarðanir í þessum efnum, í húfi sé framtíðin, framtíð okkar og barna okkar. Hún segir öðrum frambjóðendum frjálst að gera þetta loforð að sínu. Steinunn Ólína er gestur Ólafs Arnarsonar sjónvarpsþætti á Eyjunni í aðdraganda forsetakosninga. Hægt er að nálgast þáttinn hér á Eyjunni sem og á hringbraut.is og á Hringbrautarrás Sjónvarps Símans. Einnig verður hægt að nálgast hann sem hlaðvarpsþátt.

Hér má sjá brot úr þættinum:

Eyjan - Steinunn Ólína - 4.mp4

„Ég ætla að bjóða íslensku þjóðinni upp á það að hún, þessi stórkostlega söguþjóð, sem elskar landið sitt og vill allt það besta fyrir Ísland, vegna þess að þjóðin hefur sagt það að hún vill ekki gefa auðlindir sínar, hún vill ekki skemma náttúru Íslands. Ég ætla að lofa íslensku þjóðinni því, miðað við þær valdheimildir sem forseti hefur, að nýta mér það aðgerðaleysi að staðfesta engin þau lög sem varða auðlindir eða náttúru og lífríki Íslands,“ segir Steinunn Ólína.

Hér má sjá þáttinn í heild:

Steinunn Ólína Þorsteinsdóttir

„Það er loforð, vegna þess að ég lít svo á að íslenska þjóðin, um þetta verður hún að fá að kjósa sjálf. Það er ekki mitt að segja til um þetta. Ekki ríkisstjórnarinnar, ekki Alþingis. Þetta er framtíðin okkar, framtíð barnanna okkar og barnabarnabarna og allra þeirra sem á eftir koma og við getum verið í forystu annarra þjóða með því að standa sameiginlega vörð um okkar ástkæra land.“

Í samtali við Eyjuna eftir upptöku þáttarins sagði Steinunn Ólína:

,,Þetta er ekki róttæk hugmynd, hún er sjálfsögð, þjóðin verður að hafa val. Öllum meðframbjóðendum er velkomið að gera loforðið að sínu, því þetta snýst ekki um persónur og leikendur, heldur um framtíð Íslands.“