Ljóst er að Gunnar Oddur Hafliðason fjórði dómari í leik Breiðabliks og Vals á mánudag hafði veruleg áhrif á þau vafamál sem komu upp í leiknum.
Valur vann 3-2 sigur á Blikum í Kópavogi á mánudag þar sem Adam Ægir Pálsson kantmaður liðsins og Arnar Grétarsson þjálfari liðsins fuku út af.
Adam Ægir fékk sitt seinna gula spjald fyrir að svara Halldóri Árnasyni þjálfara Breiðabliks. Ljóst má vera að báðir notuðu þeir ókvæðis orð í samskiptum sínum. Adam sagði Halldór að halda kjafti en ekki hefur komið fram hvað Halldór sagði við Adam.
Á myndbandi sem 433.is hefur nú undir höndum sést hvernig Halldór byrjar að láta Adam heyra það. Kantmaðurinn svarar Halldóri og þá kemur Gunnar Oddur til leiks.
Halldór og aðstoðarmaður hans Eyjólfur Héðinsson hamast þá í Gunnari til að fá hann til þess að spjalda Adam og reka hann af velli, það bar árangur þar sem Gunnar fer í það að ná sambandi við Erlend Eiríksson dómara leiksins.
Miðað við myndband af atvikinu hefði hið minnsta verið eðlilegt að Gunnar hefði kallað eftir því að Halldór yrði einnig spjaldaður.
Það sem vekur svo einnig athygli varðandi þátt Gunnars Odds í leiknum að úr vélinni sem er fyrir ofan bekkinn sést að hann var nánast allan leikinn nálægt varamannabek Blika.
Í atvikinu sem Adam Ægir fýkur af velli er Gunnar nánast ofan í Halldóri og félögum í stað þess að staðsetja sit mitt á milli bekkjanna.
Þannig höfðu Halldór og Eyjólfur óeðlilegt aðgengi að Gunnari miðað við varamannabekk Vals sem þurfti að vaða út úr boðvangi sínum til að eiga samskipti við hann.
Fleiri umdeild atvik átu sér stað í leiknum sem ekki hefur verið fjallað um og líklega var Damir Muminovic heppinn að fá ekki rautt spjald í leiknum.
Í síðari hálfleik braut hann gróflega á Gylfa Þór Sigurðsson og urðaði svo yfir hann í kjölfarið.
Brotið sjálft verðskuldaði gult spjald og miðað við þá nýju línu sem dómarar hafa sett sér hefði Damir líklega átt að fá seinna gula spjaldið sitt fyrir það hvernig hann talaði til Gylfa.
Má sjá aðstoðarþjálfara Vals kalla eftir því að Damir fari af velli en Gunnar Oddur eða Erlendur Eiríksson voru ekki á þeim buxunum.
