Það vakti mikla athygli að Viðar Örn Kjartansson hafi verið skilinn eftir utan hóps hjá KA í leiknum gegn KR fyrir norðan í gær. Þetta er rætt í nýjasta þætti Dr. Football en þar kaupa menn ekki útskýringar þjálfarans um málið.

„Ef hann æfir vel og stendur sig vel í vikunni að þá er aldrei að vita nema að hann verði í hóp næst,“ sagði Hallgrímur Jónasson, þjálfari KA, meðal annars um fjarveru Viðars við Fótbolta.net eftir jafnteflið gegn KR í gær.

„Þetta er bara bullshit. Það vita allir á Íslandi sem eru eitthvað í kringum fótbolta að Viðar Örn er bara búinn að vera að missa úr æfingum, það er búið að gerast oftar en einu sinni og oftar en tvisvar,“ segir Hrafnkell Freyr Ágústsson ómyrkur í máli í Dr. Football.

Arnar Sveinn Geirsson var einnig í setti.

„Það eru alls konar sögur í gangi og maður veit ekki hvað er satt og hvað ekki. En það er alveg augljóst að það er eitthvað í gangi,“ segir hann.

Hrafnkell tók til máls á ný en hann bindur vonir við að Viðar eigi eftir að stíga upp og standa sig.

„Ég held hann muni rífa sig í gang og verði jafnvel í liðinu í næsta leik.“

Viðar gekk í raðir KA fyrir tímabil eftir fjölda ára í atvinnumennsku.