Fjölmiðlamaðurinn Frosti Logason, eigandi hlaðvarpsveitunnar Brotkast, sakar ónafngreint ofstækisfólk um að ráðast gegn viðmælendum sínum á hlaðvarpsveitunni á grundvelli tilraunar til slaufunar sem hann varð fyrir árið 2022. Fá viðmælendur yfir sig skammir og formælingar fyrir að mæta í viðtal til „ofbeldismanns“ sem Frosti er sakaður um að vera.
Í færslu á Facebook-síðu sinni, sem ber yfirskriftina „Þegar barátta gegn ofbeldi verður að ofbeldi“ opnar Frosti sig um málið.
„Nýlega hef ég orðið var við að hópur ofstækisfólks sé farinn að ráðast að viðmælendum mínum á hlaðvarpsveitunni Brotkast.is en núna eru tvö ár liðin síðan reynt var að slaufa mér sjálfum með skipulögðu átaki. Til þess voru notuð áratugs gömul samskipti mín, eftir sambandsslit, við fyrrverandi kærustu. Í barnslegri einlægni minn taldi ég í upphafi að um væri að ræða tímabært uppgjör á erfiðum tilfinningum. Mín fyrstu viðbrögð voru því að bjóða fram sáttarhönd og gæta þess að benda ekki fingri á neinn annan en sjálfan mig. Fljótlega kom þó í ljós að um ekkert slíkt væri að ræða. Áhersla var lögð á að gera mig ómarktækan og atvinnulausan. Til þess var dregin upp sú mynd af mér að ég væri ofbeldismaður. Í fyrstu taldi ég nóg að ég sjálfur vissi betur og fólkið sem mig þekkir. Ég hafði heldur engan áhuga á að fara opinbera einhver prívatmál úr löngu liðinni fortíð,“ skrifar Frosti.
Vísar hann þar í þegar gömul kærasta hans steig fram, áratug eftir að sambandi þeirra lauk, í viðtalsþætti Eddu Falak og lýsti sambandsslitum þeirra og bar Frosta þungum sökum. Frosti steig fram í kjölfarið og tók fulla ábyrgð á hegðun sinni og baðst afsökunar á henni en í kjölfarið missti hann lífsviðværi sitt sem sjónvarps- og útvarpsmaður á Sýn. Hann hefur hins vegar neitað því alfarið að vera ofbeldismaður og greint frá því, að hluta til, að hann hafi orðið fyrir hræðilegum svikum í sambandinu, sem hafi verið afar eitrað, og það hent orðið til þess að hann hafi fengið taugaáfall og hann farið í mikla neyslu í kjölfarið. Á því tímabili hafi hann gert hluti sem hann sé ekki stoltur af en síðan unnið í sínum málum og náð bata. Hann hafi hins vegar aldrei verið ofbeldismaður og sætti sig ekki við að vera úthrópaður sem slíkur.
Hann hafi því ákveðið að fara yfir alla söguna í nýjum Brotkast-þætti.
„Nú er svo komið að ofstækinu linnir ekki og sem fyrr segir hafa ákveðnir hópar með skipulögðum hætti tekið upp á að ráðast að viðmælendum mínum fyrir það eitt að mæta til mín í viðtöl. Ég ákvað því að tímabært væri að hlustendur mínir fengju að heyra alla sólarsöguna. Ég held að lang flest okkar hafi einhvern tíman á lífsleiðinni troðið einhverjum öðrum um tær. Þannig hafa eflaust margir framið einhvers konar ofbeldi ómeðvitað eða óvart. En það er orðið sérlega óheppilegt þegar við erum farin að beita ofbeldi í þágu sjálfrar baráttunnar gegn ofbeldi,“ skrifar Frosti.
