Mohamed Salah er eigingjarnasti leikmaður í sögu fótboltans að sögn Graeme Souness sem er fyrrum leikmaður og goðsögn Liverpool.

Salah er eins og flestir vita leikmaður Liverpool í dag en miklar líkur eru á að hann kveðji félagið í sumar.

Salah var hundfúll í síðustu umferð gegn West Ham og reifst við stjóra sinn, Jurgen Klopp, á hliðarlínunni en hann fékk örfáar mínútur í 2-2 jafntefli.

Souness hefur margt gott að segja um Salah en er einnig sannfærður um að hann sé að kveðja í sumar og að um mjög eigingjarnan spilara sé að ræða.

,,Ég trúi því að Mohamed Salah sé á förum frá Liverpool í sumar. Hann hefur verið frábær fyrir félagið en ef hann heldur til Sádi Arabíu þá verður han ein stærsta stjarnan þar í landi,“ sagði Souness.

,,Það er ekki hægt að deila um það að hann lítur mjög stórt á sjálfan sig og var reiður að fá ekki að byrja leikinn gegn West Ham í síðustu viku. Hann gerði meira mál úr þessu en Klopp.“

,,Salah er eigingjarnasti leikmaður sem ég hef nokkurn tímann séð. Janfvel fyrir þennan leik, ef hann er tekinn af velli þá er hann alltaf óánægður. Það er það sem þú vilt frá þínum leikmanni, ef þeir hafa skorað tvö mörk þá vilja þeir ná því þriðja.“