DV hefur borist ákæra frá Héraðdómi Reykjaness í máli er varðar barnslát við Nýbýlaveg. Móðir sex ára drengs hefur verið ákærð fyrir að hafa orðið honum að bana og fyrir tilraun til manndráps gagnvart 11 ára bróður drengsins.
Í ákæru kemur fram að drengurinn lést vegna köfnunar í svefni en móðirin er sögð hafa beitt kodda gegn honum er hann var sofandi, sem og höndum sínum. Hún er síðan sögð hafa gert tilraun til þess sama gagnvart bróður drengsins en hann vaknaði við atlögu hennar og losaði sig úr tökum hennar.
Ákæruliðirnir eru tveir og snerta hvor meint brot konunnnar gegn hvorum drengnum fyrir sig. Hvað varðar yngri soninn er hún ákærð fyrir manndráp og stórfellt brot í nánu sambandi. Hvað varðar eldri soninn er hún ákærð fyrir tilraun til manndráps og brot í nánu sambandi.
Héraðssaksóknari krefst þess að konan verði dæmd til refsingar og greiðslu alls sakarkostnaðar.
Vegna láts yngri sonarins gerir aðstandandi kröfu um miskabætur upp á tíu milljónir króna. Fyrir hönd bróður hans er gerð miskabótakrafa upp á átta milljónir.
Málið var þingfest fyrir Héraðsdómi Reykjaness í morgun. Þinghald er lokað og því er ekki hægt að fá upplýsingar um hvort konan lýsti sig seka eða saklausa við þingsetninguna. Aðalmeðferð í málinu hefur ekki verið ákveðin.
