„Hæhæ. Þið Facebook vinir mínir sem segið að Eurovision eigi ekki að vera pólitísk, hvað segið þið núna? Ætlið þið að láta í ykkur heyra eða þaga? Eða, er kannski hægt að túlka þessa ákvörðun sem eitthvað annað en há-pólitíska? Ef Eurovision styður eða reynir að hvítþvo þjóðamorð – þá slökkvum við á Eurovision!“ segir Birgir Örn Steinarsson, tónlistarmaður, á Facebook-síðu sinni í tilefni frétta um að bannað verið að bera fána Palestínu í Eurovision-keppninni í Stokkhólmi.

Sérstök tilkynning hefur verið gefin út um þetta bann. Segir í henni að hver sá sem reyni að koma palestínskum fána eða skilti með pólitískum boðskap inn í höllina þar sem keppnin verður haldin verði stöðvaður við innganginn (Vísir.is).

Söngkonan Þórunn Antonía hefur einnig tjáð sig um málið en það gerir hún með ummælum undir færslu Helgu Völu Helgadóttur, lögmanns. Helga Vala deilir frétt RÚV um málið og segir með háði: „Við skulum endilega ekki blanda pólitík í Eurovision…“

Þórunn segir: „Ástand heimsins og þeirra sem heima sitja og sussa á þá sem berjast gegn barnamorðum í beinu streymi gerir mig agndofa …… ég er hissa, vanmáttug og djúp sorgmædd yfir samkenndarleysi og réttlætingu fólks á fjöldamorðum barna og fjölskyldum þeirra.“

Aðeins verður leyfilegt að veifa þjóðfánum þeirra ríkja sem taka þátt í keppninni, auk regnbogafánans, en svo er litið á að hann feli ekki í sér pólitísk skilaboð.

Undanúrslitakvöldin í keppninni verða 7. og 9. maí og aðalkeppnin verður 11. maí. Fulltrúi Íslands, Hera Björk, stígur á svið 7. maí og verður hún áttundi keppandinn.