Segja má að fjölmiðlamaðurinn Helgi Seljan hafi sett ný viðmið varðandi innleiðingu pabbabrandara í fréttir í Heimildinni fyrr í dag. Þar birtist umfjöllun eftir Helga sem snerist um viðtal hans við Sauðkrækinginn Ragnar Pál Árnason sem búsettur er í götunni Reykás í Árbæ. Sumsé Ragnar Reykás okkar tíma.
Helgi útskýrir tilvist umfjöllunarinnar í færslu á Facebook-síðu sinni:
„Ég var sumsé að skutla dóttur minni í Árbæinn á dögunum og sá þetta götuheiti,“ skrifar Helgi. Hann lét dóttur sína fletta því upp í einum grænum hvort einhver Ragnar byggi í götunni og það stóð heima þegar nafn Ragnars Páls poppaði upp.
„The rest is now a documented history (Það sem á eftir kom hefur verið skráð á spjöld sögunnar). Skilningur yngri kynslóðarinnar á heimilinu á mikilvægi þessa er ekki sá sami og minn; hefur verið afgreitt sem einhver nauðaómerkilegur pabbadjókur, sem hafi gengið of langt. Það er hrein fjarstæða,“ skrifar fjölmiðlamaðurinn léttur.
