Þetta lítur kannski vel út fyrir Kreml, en kannski aðallega á pappírunum. Ástæðan er að þegar gripið var til herkvaðningar haustið 2022 brutust mótmæli út í mörgum héruðum landsins og ný herkvaðning verður örugglega ekki vinsæl.
Af þessum sökum hafa Rússa síðasta hálfa annað árið einbeitt sér að því að fá sjálfboðaliða til að ganga til liðs við herinn. Þetta er oft gert með ansi harkalegum aðferðum, til dæmis með því að sækja fanga í fangelsi landsins eða með því að neyða innflytjendur frá Miðasíuríkjum í herinn.
En það hefur gengið á þessar uppsprettur hermanna og herinn stendur frammi fyrir að þurfa að fylla upp í þau göt sem myndast í hersveitunum á vígvellinum vegna mannfalls og vegna stórhuga áætlana um að fjölga hermönnum um þriðjung, eða upp í 1,5 milljónir. Þetta á meðal annars að gera til að geta styrkt varnirnar á norðvesturvængnum, það er við finnsku landamærin. Sérfræðingar segja erfitt að sjá hvernig á að vera hægt að gera þetta nema með herkvaðningu.
Úkraínski herinn glímir einnig við skort á hermönnum. Íbúafjöldi Úkraínu er tæplega einn þriðji af íbúafjölda Rússlands og því er úr færri mönnum að moða þegar kemur að því að manna her landsins. Lág fæðingartíðni í landinu á tíunda áratugnum, í kjölfar hruns Sovétríkjanna, og miklir fólksflutningar úr landi gera að verkum að það eru mun færri Úkraínubúar í aldurshópnum 30-35 ára en í eldri aldurshópum.
Úkraínskir stjórnmálamenn standa frammi fyrir því að þurfa að taka ákvörðun um hvort gripið verði til herkvaðningar í landinu. Þetta er eldfimt mál og því hafa margir stjórnmálamenn verið hikandi við að taka afstöðu til málsins. Á sama tíma kallar herinn eftir fleiri hermönnum. Rætt hefur verið um að þörf sé á að fá 450.000 til 500.000 nýja menn til liðs við herinn.
