Segja má að uppþotið innan Kveiks-teymis RÚV hafi verið ein af stærri fréttum vikunnar. Um var að ræða innslag sem fréttakonan þjóðkunna, María Sigrún Hilmarsdóttir, hafði unnið að í marga mánuði en að endingu ákvað ritstjóri Kveiks, Ingólfur Bjarni Sigfússon, að birta ekki umfjöllunina og reka María Sigrúnu úr teyminu með þeim orðum að hæfileikar hennar nýttust betur í að lesa fréttir en vinna rannsóknarvinnuna á bak við þær.

Ekki sér fyrir endann á væringunum en María Sigrún, sem hefur starfað á RÚV í tæpa tvo áratugi, hefur verið opinská með það að henni er verulega misboðið.

Yngri bróðir Maríu Sigrúnar er ekki heldur ókunnur sjónvarpsskjám landsmanna en það er Sigurður Örn Hilmarsson, formaður Lögmannafélags Íslands og einn af eigendum lögfræðistofunnar Réttar. Eðli málsins samkvæmt er hann reglulegur viðmælandi fréttastofa landsins varðandi hin ýmsu lögfræðilegu álitamál.

Foreldrar systkinanna eru þau Hilmar Þór Björnsson, arkitekt, og Svanhildur Sigurðardóttir, sem starfaði um árabil hjá Icelandair, meðal annars sem innkaupastjóri eldsneytis.