Hún ætlar sér stóra hluti ef hún verður kosin í embættið og langar meðal annars að hjálpa ungu fólki í húsnæðisvanda.
Þegar Heimir Már Pétursson, fréttamaður Stöðvar 2, sagði það kannski ekki tengjast forsetaembættinu sagðist Ásdís vera kona með kjark.
„Ekki segja að ég geti það ekki, ég er hér núna,“ sagði hún við Heimi í myndbandi á Vísi.
Heimir spurði hvað væri helsta erindi hennar í framboð til forseta og hvers vegna hún hafi ákveðið að blanda sér í þennan leik.
„Ég held að ég sé búin að fá alveg rosalega góða þjálfun núna síðustu ár erlendis, ég er búin að vera í hálfgerðu ambassador starfi og búin að vera að kynna land og þjóð út um allan heim, í viðtölum og ég held að ég sé mjög hæf til þess að taka að mér þetta starf.“
Þá spurði Heimir: En hvað hefurðu fram að færa til embættisins, hverjar verða þínar áherslur í embættinu?
„Heyrðu, það verða.. ég ætla að fara á fulla ferð í góðgerðamál. Mig langar til þess að auðvelda fólkinu lífið hérna á Íslandi. Koma til móts við barnafólk, eldra fólk og líka unga fólkið sem vantar húsnæði og svoleiðis.“
Forseti hefur kannski ekki neitt ákvörðunarvald í þeim efnum en kemur við sögu við stjórnarmyndun ef það er stjórnarkreppa. Treystirðu þér til þess?
„Að sjálfsögðu. Ég er kona með kjark þannig að ég get það alveg fyllilega og ég get líka allt hitt. Ekki segja að ég geti það ekki, ég er hér núna,“ sagði Ásdís brosandi.
„Ef ég get flogið þremur gerðum af þyrlum þá get ég tekið ákvarðanir fyrir þjóðina, það er alveg víst.“
