„Ég vil ekki treyjurnar ykkar. Ég vil bara að þið berjist fyrir okkar,“ stóð á skilti sem ungur stuðningsmaður Chelsea mætti með á leik liðsins gegn Arsenal í gær.
Hörmulegt gengi Chelsea í vetur er farið að pirra stuðningsmenn, búið er að versla marga öfluga leikmenn en liðsheildin er lítil.
Oftar en ekki mæta ungir krakkar með skilti til að biðja um treyju frá leikmanni en þessi ungi drengur er ekki þar.
Arsenal tók nágranna sína í Chelsea og slátraði þeim í ensku úrvalsdeildinni í gær. Leikurinn fór fram á Emirates vellinum í London.
Leandro Trossard skoraði eina mark fyrri hálfleiks þar sem bæði lið ógnuðu marki. Chelsea var þá meira með boltann en Arsenal gerði vel.
Í síðari hálfleik henti Arsenal í algjöra sýningu þar sem Ben White skoraði tvö og Kai Havertz setti tvö. Lokastaðan 5-0.
Havertz var seldur til Arsenal frá Chelsea síðasta sumar, kaup sem voru umdeild en hafa svo sannarlega heppnast vel.
Arsenal er komið með þriggja stiga forskot á Liverpool á toppi deildarinnar en Liverpool á leik til góða. Manchester City er svo fjórum stigum á eftir en á tvo leiki til góða.
