Össur Skarphéðinsson, fyrrverandi ráðherra og eindreginn stuðningsmaður forsetaframbjóðandans Katrínar Jakobsdóttur, skýtur föstum skotum á annan frambjóðanda, Jón Gnarr. Jóni hefur verið tíðrætt um framboð Katrínar og telur það gagnrýnisvert í ljósi þess að hún er fráfarandi forsætisráðherra. Segir hann forskot Katrínar gagnvart öðrum frambjóðendum vera ósanngjarnt.

Össur er ekki sammála þessu. Í nýjum Facebook-pistli segir hann að fólk eigi einfaldlega að hafa val um frambjóðendur. Hann spyr hvar draga eigi línuna og bendir um leið á forgjöf sem hann telur að Jón njóti:

„Jóni Gnarr finnst það skrítið, og ýjar að því að það sé hálfgert svindl gagnvart honum og öðrum frambjóðendum til forseta, að kona sem hefur gegnt stöðu forsætisráðherra leyfi sér að bjóða sig fram – einsog hann. Slíkur einstaklingur hafi svo mikið forskot af því hún er svo þekkt, og hefur verið svo mikið í fjölmiðlum.

Hverjir mega þá bjóða sig fram til forseta? Hvar vill hann draga línuna? Mega t.d. fyndnu kallarnir sem hafa í tvo áratugi verið vinsælustu grínistar sjónvarpa og útvarpa og eru líklega jafn þekktir og helstu brýni stjórnmálanna bjóða sig fram? Vitaskuld. Það hlýtur samt að vera á grensunni ef maður huxar línu Jóns Gnarr til enda sem höfundurinn hefur greinilega ekki gert.

Hvað með fyrrverandi borgarstjóra? Sú staða var löngum talin með þremur valdamestu embættum á Íslandi. Jón Gnarr var sjálfur (góður) borgarstjóri og tröllreið fjölmiðlum í því hlutverki. Er eitthvað að því að hann bjóði sig til forráða á Bessastöðum? Vitaskuld ekki.“

Össur segir að Jón hagi sér eins og fígúran Georg Bjarnfreðarson og segir honum að hætta að væla:

Fólk á einfaldlega að hafa val. Ef menn vilja einstakling sem hefur djúpa reynslu líkt og Ólafur Ragnar eða Katrín Jakobsdóttir þá eiga þeir að hafa frelsi til að geta valið slíkan frambjóðanda ef hann á annað borð er í boði. Ef þeir vilja fremur fyndinn kall sem segist ekki ætla að vera trúður á Bessastöðum en kallar sig nú þegar með sögulegri íroníu „Jón forseta“ þá eiga þeir endilega að kjósa hann.

Jón Gnarr á að hætta að væla um þetta í hverjum þætti, og hætta að vera gnavinn einsog Georg Bjarnfreðarson. Þá munu snarlega aukast líkurnar á að hann muni í framtíðinni brosa sínu breiða brosi af Álftanesinu til glaðrar þjóðar.