Axel Óskar Andrésson, varnarmaður KR, var gestur í nýjasta þætti af Íþróttavikunni. Helgi Fannar Sigurðsson og Hrafnkell Freyr Ágústsson hafa umsjón með þættinum.
Axel gekk í raðir KR frá sænska B-deildarliðnu Örebro fyrir tímabil og er ansi sáttur í Vesturbænum.
„Það er skrýtið að vera kominn aftur heim í íslenskan fótbolta, en það er bara æðislegt,“ sagði Axel í þættinum.
„Ég er búinn að horfa á deildina undanfarin ár og sjá mikinn uppgang. Svo það var ekkert vanmat að koma hingað.“
Gregg Ryder tók við sem þjálfari KR fyrir tímabil og undir hans stjórn hefur liðið unnið fyrstu tvo leiki sína í Bestu deildinni.
„Ég er mjög hrifinn af hans störfum. Ég vissi ekki mikið um hann áður en hann fór í KR. En hann er bara geggjaður karakter.“
Gregg er búinn að gera vel í að virkja stuðningsmenn KR og fá þá á sitt band.
„Hann meinar þetta líka, hann er ekki bara að segja þetta. Hann er að ræða við okkur inni í klefa um að virkja þessa stuðningsmenn sem KR á. Það skiptir máli,“ sagði Axel.
Umræðan í heild er í spilaranum.
