Georgía Björnsson, Dóra Þórhallsdóttir, Halldóra Ingólfsdóttir, Guðrún Katrín Þorbergsdóttir, Dorrit Moussaieff og Eliza Reid eru forsetafrúr Íslands. Eini kvenforsetinn, Vigdís Finnbogadóttir, var makalaus á Bessastöðum.
Nýr forseti verður kosinn í júní en hver flytur með honum til Bessastaða, ef þá nokkur? DV kannaði hverjir væru makar helstu forsetaframbjóðenda.
Enginn maki forsetaframbjóðanda er jafn áberandi og Felix Bergsson, eiginmaður Baldurs Þórhallssonar, enda heitir framboðið Baldur og Felix.
Baldur og Felix hittust fyrst á bókasafni Samtakanna 78 þegar Baldur var nýkominn út úr skápnum en Felix nokkrum árum áður. Báðir áttu þeir barn úr fyrra sambandi.
Felix Bergsson, þarf vart að kynna fyrir þjóðinni. Fyrrum söngvari Greifanna, leikari og sjónvarpsmaður til áratuga. Hefur meðal annars stýrt vinsælu barnaefni og Eurovision þáttum á RÚV.
Í september á síðasta ári bárust fyrstu fréttir af því að fyrirsætan Ásdís Rán Gunnarsdóttir og Þórður Daníel Þórðarson væru farin að stinga saman nefjum.
Bæði hafa þau verið búsett í Búlgaríu en þar rekur hann rafrettubúðina Icestore í borginni Plovdiv.
Þórður er sex árum yngri en Ásdís og hefur getið sér gott orð sem útvarpsmaður. DV veit ekki til þess að þau séu gift.
Jón Gnarr er giftur Jógu Gnarr Jóhannsdóttur. Eiga þau saman fimm börn.
Jóga hefur ekki mikið verið í sviðsljósinu á undanförnum áratugum eins og eiginmaður hennar. En árið 2017 var kastljósinu beint að henni þegar Jón skrifaði bókina Þúsund krossar. Bókin fjallaði um baráttu Jógu við kerfið eftir alvarlegt bílslys á unga aldri í Bandaríkjunum.
Halla Tómasardóttir hitti tilvonandi eiginmann sinn, Grindvíkinginn Björn Skúlason, í Eurovision partí árið 1999. Hún hafði hins vegar kynnst honum áður þegar hann var ungur knattspyrnumaður og hún að fá Íslendinga til að spila fyrir Alabama háskóla.
Halla og Björn eiga í dag tvö uppkomin börn. Björn er sálfræðingur sem starfaði um árabil hjá trygginga og fjármálafyrirtækjum. Hann tók síðan U-beygju á sínum ferli og gerðist heilsukokkur. Hann rekur í dag fyrirtækið Just Björn sem framleiðir norrænar náttúru og heilsuvörur.
Ástþór Magnússon Wium og Natalía Wium kynntust á styrktartónleikum fyrir Mæðrastyrksnefnd um jólin árið 2001. Ástþór bjó á þeim tíma í London.
Natalía, sem er lögfræðingur að mennt og frá Rússlandi, hafði flutt til Íslands árið 2000 þegar hún giftist fyrri eiginmanni sínum. Ástþór og Natalía giftust árið 2004.
Ástþór á dóttur úr fyrra hjónabandi og þrjú barnabörn.
Katrín Jakobsdóttir og Gunnar Sigvaldason giftu sig í leyni árið 2007. En þá var hún kasólétt af syni númer tvö af þremur í röðinni.
Þrátt fyrir að Katrín hafi verið stanslaust í kastljósi fjölmiðla um margra ára skeið hefur lítið farið fyrir Gunnari.
Gunnar er háskólakennari og heimspekingur við stjórnmálafræðideild Háskóla Íslands þar sem hann kennir meðal annars kúrsa í stjórnmálum og siðfræði.
Arnar Þór Jónsson og Hrafnhildur Sigurðardóttir kynntust sumarið 1990. Þau eiga fimm börn og hafa lengst af verið búsett í Garðabæ, en einnig í Vín, Cambridge og á Akureyri.
Hrafnhildur er grunnskólakennari að mennt en hefur komið víða við, svo sem í náttúrulækningum og jóga. Hún hefur í rúman áratug rekið fyrirtækið Hugarfrelsi sem börnum, foreldrum og fagfólki er kennt að nota einfaldar aðferðir til að efla sjálfsmynd og vellíðan.
Steinunn Ólína Þorsteinsdóttir er ekkja leikarans Stefáns Karls Stefánssonar, leikara og baráttumanni gegn einelti. Hann lést úr krabbameini árið 2018 en þau Steinunn höfðu verið gift í 16 ár.
DV hefur ekki vitneskju um að Steinunn sé með maka á þessari stundu.
Sylwia Gretarsson, eiginkona Guðmundar Felix, er pólsk að uppruna. Hún flutti 18 ára gömul til Frakklands til að gerast au pair og þar ílengdist hún, stundaði nám í Montpellier og flutti loks til Lyon. Þar bjuggu þau Guðmundur lengi á meðan hann beið eftir og undirgekkst handaágræðsluna frægu.
Sylwia er jógakennari og lærði meðal annars í Indlandi og einnig hefur hún iðkað ilmmeðferð. Þau Guðmundur eru barnlaus.
Halla Hrund Logadóttir er gift Kristjáni Frey Kristjánssyni og eiga þau saman tvær ungar dætur.
Kristján Freyr kemur úr viðskiptalífinu. Hann er framkvæmdastjóri og meðstofnandi hugbúnaðarfyrirtækisins 50skills.
Hann hefur komið víða við, svo sem hjá Klak Innovit og Meniga. Hann hefur komið að ýmissi nýsköpun svo sem frumkvöðlakeppninni Gullegginu og Startup Weekend í Seattle í Bandaríkjunum.
Sigríður Hrund Pétursdóttir og Baldur Ingvarsson giftu sig árið 2003. Um tíma glímdu þau við ófrjósemi en hafa síðan eignast fjögur börn.
Baldur er húsasmíðameistari frá Akureyri og reka þau Sigríður vinnupallafyrirtæki. Á síðasta ári komst það í fréttirnar þegar Sigríður og Baldur endurnýjuðu brúðkaupsheitin.
Helga Þórisdóttir er gift Theodóri Jóhannssyni. Eiga þau þrjú börn.
Theodór er sjúkraþjálfari og íþróttakennari hjá Sjúkraþjálfun Reykjavíkur.
