Alls 32 tilvik um ofbeldisbrot gegn starfsfólki Embættis héraðssaksókjanra voru skráð í fyrra. Árið árið, 2022, voru tilvikin 13 en fyrir um áratug voru engin slík tilvik skráð, það er árin 2013, 2014 og 2015.

Þetta kemur fram í svari dómsmálaráðherra við fyrirspurn þingmannsins Njáls Trausta Friðbertssonar, þingmanns Sjálfstæðisflokksins, um hótanir og ofbeldi gagnvart starfsmönnum lögreglu, ákæruvalds og dómsvalds. RÚV greindi frá.

Miðað er við brot er varða 106. grein almennra hegningarlaga en hún er svohljóðandi:

„Hver, sem ræðst með ofbeldi eða hótunum um ofbeldi á opinberan starfsmann, þegar hann er að gegna skyldustarfi sínu eða út af því, og eins hver sá, sem á sama hátt leitast við að hindra framkvæmd slíks starfa eða neyða starfsmanninn til þess að framkvæma einhverja athöfn í embætti sínu eða sýslan, skal sæta … ¹⁾ fangelsi allt að 6 árum. [Ef brot samkvæmt þessari málsgrein beinist að opinberum starfsmanni, sem að lögum hefur heimild til líkamlegrar valdbeitingar, má beita fangelsi allt að 8 árum.] ²⁾ [Beita má sektum, ef brot er smáfellt.] “

Ofbeldisbrotum gegn lögreglumönnum hefur einnig fjölgað, árið 2013 voru þau 146 talsins en árið 2023 voru þau 256. Brotunum hefur fjölgað jafnt og þétt síðastliðin ár, með undantekningum þó. Hér að neðan má sjá töflu um brot gegn öllum opinberum starfsmönnum síðustu tíu ár. Fleiri töflur og nánari upplýsingar má sjá hér.