Fyrri umferð kosninga um embætti biskups Íslands er lokið og þar sem enginn frambjóðandi halut meirihluta atkvæða verður kosið á milli tveggja efstu frambjóðendanna. Þeir eru Guðmundur Karl Brynjarsson og Guðrún Karls Helgudóttir. Þetta kemur fram í tilkynningu á vef Þjóðkirkjunnar.
Þar kemur fram að kosning biskups Íslands fór fram dagana 11.- 16. apríl og lauk kosningunni á hádegi í dag 16. apríl.
Þrjú voru í kjöri og féllu atkvæði þannig:
Guðrún Karls Helgudóttir hlaut 839 atkvæði eða 45,97 prósent.
Guðmundur Karl Brynjarsson hlaut 513 atkvæði eða 28,11 prósent.
Elínborg Sturludóttir hlaut 465 atkvæði eða 25,48 prósent.
Á kjörskrá voru 2286 og greiddu 1825 átkvæði eða 79,83 prósent.
Átta tóku ekki afstöðu.
Eins og áður segir kemur fram í tilkynningunni að þar sem enginn frambjóðandi fékk meiri hluta greiddra atkvæða verður kosið á nýjan leik milli þeirra tveggja sem flest atkvæði fengu.
Stefnt er að því að seinni umferð kosninganna hefjist fimmtudaginn 2. maí kl. 12:00 á hádegi og standi til þriðjudagsins 7. maí kl. 12:00 á hádegi.
