Forráðamenn Manchester United eru ósáttir við ensku úrvalsdeildina vegna leiktíma leiks liðsins gegn Crystal Palace í næsta mánuði. Félagið hefur skrifað bréf til deildarinnar.
United heimsækir Palace mánudaginn 6. maí klukkan 20 en um er að ræða frídag á Englandi (bank holiday). Þýðir þetta að stuðningsmenn United sem ferðast í leiknn geta ekki tekið lest heim til Manchester eftir hann vegna þess hversu seint hann verður búinn.
United hefur sent úrvalsdeildinni bréf og sakað þá sem þar ráða um að hugsa ekkert um stuðningsmenn.
Þá hefur félagið boðið þeim sem eiga miða á leikinn fría rútuferð heim og munu allir miðahafar eiga möguleika á að vinna áritaða United treyju.
„Við deilum pirringi okkar með ykkur vegna þeirra vandamála sem þessi leiktími hefur í för með sér,“ segir meðal annars í yfirlýsingu United til stuðningsmanna.
