Aron Sigurðarson, leikmaður KR, á ekki von á því að verða frá nema í viku eða tvær vegna meiðsla sem hann varð fyrir á sunnudag. Hann fær úr myndatöku í dag.
Aron hafði verið að glíma við meiðsli aftan í læri sem tóku sig upp á nýjan leik í upphitun gegn Fylki.
„Ég meiddist aðeins aftan í læri um daginn sem var ekkert alvarlegt, ég æfði svo 100 prósent í viku fyrir leik,“ segir Aron í samtali við 433.is en rætt hefur verið um að hann hafi verið meiddur fyrir leikinn svo var ekki.
„Þetta kemur svo aftur upp í upphitun en ég þrjóskaðist til þess að spila, ég var hins vegar bara á annari löppinni. Ég gat ekki sprett eða notað vinstri löppina neitt.“
Aron sem kom heim úr atvinnumennsku fyrir þetta tímabil er vongóður um að bataferlið verði stutt.
„Við fáum út úr myndatöku í dag, ég held að þetta verði vika eða tvær. Ég var enga stund að jafna mig síðast og þetta er ekki jafn slæmt núna,“ segir Aron að lokum.
