Það er gömul saga og ný að peningar gera fólk ekki hamingjusamt þó vissulega séu peningavandræði afar skaðleg fyrir andlega heilsu fólks. Dr. Michael Mosley fjallaði um hamingjuna í pistli á Daily Mail á dögunum og þar varpaði hann fram fimm einföldum, sem og ókeypis, ráðum sem geta stuðlað að aukinni hamingju fólks.
Á tímum samfélagsmiðla er sífellt að draga úr mannlegum samskiptum. Það er þó ekki hollt því það er einfaldlega vísindalega sannað að samskipti, þó ekki sé nema stutt vinaleg samskipti við ókunnugan starfsmann verslunnar sem þú ferð í eða einhvern annan sem þú hittir á förnum vegi, hefur jákvæð áhrif á geðslagið. Við mannfólkið erum einfaldlega hjarðdýr og samskipti eru okkur mikilvæg.
Rannsóknir hafa sýnt að það að gefa gjafir virkjar vellíðunarstöðvar í heilanum. Ef þú hefur svigrúm þá skaltu frekar eyða peningunum í annað fólk en sjálfan þig. Og svo þarf ekki endilega peninga til. Rannsóknir sýna að ef þú ert góður við aðra þá eykst hamingja þín sem og þess sem nýtur góðvildar þinnar.
Að nýta tækifærin til þess að njóta náttúrunnar, eitthvað sem við Íslendingar eigum blessunarlega gnótt af, stuðlar að aukinni hamingju. Sérstaklega virkar útiveran vel til þess að slökkva á neikvæðum hugsunum og niðurrifi.
Það bendir ýmislegt til þess að sú venja að fara reglulega yfir litla hluti sem maður getur verið þakklátur fyrir stuðli að aukinni hamingju. Ekki bara það heldur eru vísbendingar um að iðkun þakklætis lækki blóðþrýsting, bæti svefn og dragi úr verkjum. Sniðug leið er að þylja upp þrjá hluti, eða jafnvel skrifa þá niður, sem maður getur verið þakklátur fyrir á hverju kvöldi.
