Körfuknattleiksdeild ÍR birti í gærkvöldi afsökunarbeiðni á Facebook-síðu sinni vegna orðbragðs sem viðhöfð voru á ÍR TV í vefútsendingu frá heimaleik félagsins gegn liði Selfoss í úrslitakeppni 1. deildar karla í körfuknattleik síðastliðinn föstudag. Beindu lýsendur leiksins orðum sínum að einum leikmanna Selfoss og létu ýmis misfögur orð falla í hans garð eftir að leikmaðurinn braut nokkuð fast á einum leikmanna ÍR.
Sagði annar þeirra meðal annars:
„Hættu þessu þarna, litla draslið þitt. Litli aumingi.“
Hinn bætti þá við:
„Þetta er vælukjói. Númer 0 hjá Selfoss. Algjör vælukjói. Búinn að vera svona allan leikinn. Það nennir honum enginn. Allir þreyttir á honum.“
Hinn lýsandinn tók loks aftur til máls:
„Hundleiðinlegur karakter, maður. Jesús minn hvað ég þoli hann ekki.“
Myndband með þessum orðaskiptum úr lýsingu ÍR TV má sjá hér að neðan en ÍR lék í hvítum búningum og Selfoss í dökkum búningum.
Úff, smá standard #írkarfa pic.twitter.com/UolMGwMBfK
— Sæmundur Þór Guðveigsson (@saemithor13) April 5, 2024
Því er einnig haldið fram á samfélagsmiðlum að stuðningsmaður ÍR sem var viðstaddur leikinn hafi tekið einn leikmann Selfoss sérstaklega fyrir með köllum og ljótum athugasemdum. Miðað við það virðast því lýsendur ÍR TV ekki hafa verið einir um að hafa viðhaft athugasemdir í garð leikmanna Selfoss sem sumum, miðað við athugasemdir á samfélagsmiðlum, sem viðstödd voru leikinn eða horfðu á hann í útsendingu ÍR TV þóttu ósæmileg.
Eins og áður segir baðst körfuknattleiksdeild ÍR, ásamt ÍR TV, afsökunar í færslu á Facebook-síðu sinni á orðbragðinu sem viðhaft var í útsendingu ÍR TV en það er á vegum félagsins eins og sambærilegar rásir annarra félaga sem senda heimaleiki sína beint út í gegnum internetið, leyfi réttindamál slíkar útsendingar. Lýsendur í slíkum útsendingum eru yfirleitt tengdir viðkomandi félagi. Afsökunarbeiðni körfuknattleiksdeildar ÍR og ÍR TV er svohljóðandi:
„KKD ÍR og ÍR TV harma þau ummæli sem látinn voru falla í vefútsendingu ÍR TV yfir leik ÍR og Selfoss sl. föstudag. Ummælin eru hvorki félaginu né ÍR TV til framdráttar og biðjum við alla hluteigandi aðila afsökunar á þeim ummælum sem fóru út í nafni félagsins. Tekið verður á þessum málum innan KKD ÍR og brugðist við eins og þurfa þykir. Það er okkar ósk að þessi ummæli setji ekki meiri svip á einvígi tveggja flottra körfuboltaliða sem voru til fyrirmyndar innan vallar.
Virðingarfyllst,
Stjórn KKD ÍR og forsvarsmenn ÍR TV“
