Arnar Grétarsson, þjálfari Vals, var ánægður með sína menn eftir leik við ÍA á Hlíðarenda í kvöld.

Um var að ræða leik í fyrstu umferð Bestu deildarinnar en Valur hafði betur 2-0 nokkuð sannfærandi.

Arnar hafði í raun litlar áhyggjur af leiknum í kvöld en hefði viljað skora enn fleiri mörk en hann ræddi við Stöð 2 Sport eftir lokaflautið.

,,Mér fannst þetta heilt yfir flott frammistaða, við tókum leikinn í okkar hendur alveg frá byrjun. Við mættum grimmir og erum með boltann nánast allan tímann. Það eina sem við getum sagt er að nýtingin var ekki nógu góð,“ sagði Arnar við Stöð 2 Sport.

,,Ég hefði viljað sjá þriðja markið og stúta leiknum og getað bætt við fleirum en heilt yfir var þetta flott frammistaða.“

,,Ég held að fólk geri sér ekki grein fyrir því að spila fótbolta í þessum kulda og þessum vind, völlurinn verður þurr og það verður allt miklu erfiðara.“

Arnar ræddi svo Gylfa Þór Sigurðsson sem samdi við félagið fyrr á árinu og skoraði annað markið í kvöld.

,,Með heimkomu ákveðins leikmanns kemur ákveðin pressa og ég held að hann hafi sýnt í dag hvað hann getur, hann er ekki búinn að gleyma neinu.“

,,Hann er kátur og brosandi sem er mikið ánægjuefni en við skulum vera rólegir, þetta er einn leikur.“