Lögreglan hefur hætt rannsókn máls vegna kæru gegn Semu Erlu Serdaroglu og Maríu Lilju Ingveldar-Þrastardóttur. Helga Vala Helgadóttir, lögmaður Semu, greinir frá þessu.

„Þessa dagana eru sjálfboðaliðar í Kaíró á vegum Solaris hjálparsamtaka að vinna þrekvirki við að taka á móti fjölda Palestínufólks með dvalarleyfi á Íslandi, mest konum og börnum, sem eru að flýja þjóðarmorð á Gaza. Þökk sé öllum þeim þúsundum einstaklinga sem studdu landssöfnun fyrir Palestínu hefur sjálboðaliðum tekist að koma nærri 150 manns úr bráðum lífsháska og mannúðarkrísu en íslensk stjórnvöld hættu störfum og skildu þar með eftir tugi einstaklinga sem sjálfboðaliðar hafa nú komið undan þjóðernishreinsunumm,“ segir Helga.

„Því miður þá hefur orka tveggja forsvarskvenna aðgerða Solaris í Kaíró, þeirra Semu Erlu Serdaroglu og Maríu Lilju Ingveldar-Þrastardóttur, farið í það undanfarna daga að verjast tilhæfulausri kæru Einars S. Hálfdánarsonar, sem sakaði þær meðal annars um refsiverð brot við fjársöfnunina og að hafa borið mútufé í erlenda opinbera starfsmenn í tengslum við aðstoð sína við palestínskt fólk á flótta.“

Þetta séu pólitískar ofsóknir og algjörlega tilhæfulausar kærur sem skipti engu máli í stóru myndinni. Verkefni Solari séu mikilvægari en svo að láta slíkt trufla.

„Þær eru hins vegar fyrst og fremst merki um tilraun manns með sterk tengsl við valdakerfið til að eyðileggja orðspor fólks og valda því skaða, m.a. hafa af því lífsviðurværið, þar sem kærunni var meðal annars dreift til vinnuveitenda hinna kærðu, allt í þeim tilgangi að stöðva baráttuna fyrir mannréttindum.“

Lögreglan hefur hætt rannsókninni vegna þess að ekki er talinn grundvöllur til að halda henni áfram.

„Kæran var ekki studd neinum gögnum og að því er virðist eingöngu innihaldslaust hugarfóstur kæranda, í þeim tilgangi að hræða baráttufólk fyrir mannréttindum,“ segir Helga Vala.