Besta deild karla fer af stað á laugardag og 433.is er að sjálfsögðu með spá fyrir leiktíðina. Spáin var opinberuð í Íþróttavikunni sem kemur út vikulega. Þar voru Helgi Fannar Sigurðsson og Hrafnkell Freyr Ágústsson að vanda og í þetta sinn sat sparkspekingurinn og hlaðvarpsstjarnan Kristján Óli Sigurðsson með þeim.

7. sæti: ÍA
Lykilmaður: Viktor Jónsson
Niðurstaða í fyrra: 1. sæti í Lengjudeildinni

,,Það sem ég hef áhyggjur af með ÍA er vörnin, þeir eru með Hlyn sem hefur ekki gert neitt að viti, Óliver Stefánsson sem kom á láni og var lala og svo er hafsentinn þeirra, vinur Haaland, Erik Sandberg er hann ekki bara of massaður sá gæi eða?“ sagði Hrafnkell um ÍA.

,,Hann er fallegur en hann er helvíti massaður.“

Kristján telur að ÍA verði ekki í fallbaráttu þetta árið og segir að nokkrir öflugir leikmenn séu í leikmannahópi liðsins.

,,Ég sé þá ekki dragast í fallbaráttu, Vardic er hörkuleikmaður og svo Rúnar, ég veit ekki með þennan Norðmann. Arnór Smára er í hörkustandi en ég myndi segja að hann sé 70 mínútna maður, hann fer ekki hratt yfir en er með fótboltaheila upp á tíu,“ bætir Kristján við.