Helga Vala Helgadóttir, fyrrverandi þingmaður Samfylkingarinnar, segir að Katrín Jakobsdóttir forsætisráðherra muni tilkynna um forsetaframboð síðar í vikunni. Helga Vala segir að þetta hafi ekki áhrif á líf ríkisstjórnarinnar en hún muni starfa áfram undir forystu Sigurðar Inga Jóhannssonar, innviðaráðherra og formanns Framsóknarflokksins. Helga Vala segir að gremja Sjálfstæðismanna í garð Framsóknarflokksins sé djúpstæðari en alþekkt gremja þeirra í garð VG.

Helga Vala segir í pistli á Facebook:

„Það mun ekki hafa áhrif á líf ríkisstjórnarinnar sem mun starfa áfram undir forystu Sigurðar Inga. Þórdís Kolbrún verður áfram fjármála og Svandís verður innviðaráðherra. Bjarkey eða Bjarni Jóns taka matvæla og vantraust fer af borðinu. Það er ekkert að fara að gerast í fiskveiðistjórnunarkerfinu eða öðru enda kosningavetur framundan, kosið verður vorið 2025.

Af hverju er þetta svona? Jú, Sjallar treysta framsókn alls ekki fyrir fjármálaráðuneytinu. Þrátt fyrir að allir fjölmiðlar hafi eingöngu fjallað um spennuna á milli XD og VG undanfarin misseri þá er það smáræði miðað við djúpgremju XD í garð Framsóknar. Þar getur fólk varla dvalið í sama herbergi enda gerir framsókn bara það sem þeim sýnist og lofa milljörðum hægri vinstri, og ef það er ekki samþykkt við ríkisstjórnarborðið þá er bara farið til formannsins sem finnur aur í jöfnunarsjóðnum. Forysta XD vill kosningar 2025, ekki núna þótt sjá megi stöku ráðherra í kosningaham, en hann er vegna formannskosninga en ekki þingkosninga. VG vill ekki kosningar núna því þau þurfa að laða að nýtt fólk í framvarðasveitina og Framsókn… tjah… þau hafa verið í kosningabaráttu undanfarna mánuði en formanninum hugnast að verða forsætisráðherra í rúmt ár.“