Björgunarsveitir í Húnavatnssýslum og Skagafirði hafa staðið í ströngu í dag við að aðstoða ferðalanga yfir og niður af Vatnsskarði og út Langadal. Þetta kemur fram í tilkynningu frá Landsbjörgu.

Mikil hálka er efst í Bólstaðahlíðarbrekku og hafa bílar fokið þar til. Einnig eru dæmi um að bílstjórar hafi ekki treyst sér til að keyra áfram og hefur þá björgunarsveitafólk keyrt bílana niður. Safnað er saman í hópakstur og bílum fylgt niður beggja vegna Vatnsskarðs.

Í tilkynningunni segir ennfremur:

„Björgunarsveitin á Dalvík fór fyrr í dag til aðstoðar fólki sem var á ferð um Árskógsstrandarveg. Talsverður fjöldi ökumanna var í vandræðum þar og eitthvert tjón varð á ökutækjum þegar þau rákust saman.

Aðgerðum þar er að mestu lokið en enn er verið að fylgja ferðalöngum niður af Vatnsskarði bæði austan og vestan megin.

Eins og stendur er þar ekkert ferðaveður og fólk hvatt til að bíða með ferðalög milli landshluta fyrir norðan.“

Meðfylgjandi eru myndir af bílalest sem verið er að fylgja niður af Vatnsskarði.