Helgi Fannar Sigurðsson skrifar frá Wroclaw
Karlalandsliðið okkar er mætt til pólsku borgarinnar Wroclaw, þangað sem liðið flaug frá Búdapest í dag. Tveir dagar eru í úrslitaleik við Úkraínu um sæti á EM í sumar og eftirvæntingin er mikil.
Eins og flestir vita nú tryggðu Strákarnir okkar sér þennan úrslitaleik með 4-1 sigri á Ísrael í Búdapest á fimmtudag, úrslit sem voru framar björtustu vonum. Það voru jú ekki endilega svo margir Íslendingar sem gerðu sér vonir um sigur í leiknum, enda gengi karlalandsliðsins undanfarið ekki bent til þess að sigur myndi vinnast. Þetta fór þó allt saman svona glæsilega og snilli Alberts Guðmundssonar, sem gerði þrennu í leiknum, spilaði þar stóra rullu.
Verkefnið sem framundan er gegn Úkraínu er strembið, vægast sagt. Úkraínska liðið er skipað mönnum úr bestu deildum heims, svosem ensku úrvalsdeildinni. Miði er þó alltaf möguleiki og karakterinn sem íslenska liðið sýndi eftir að hafa lent undir gegn Ísrael á fimmtudag bendir til þess að eigi menn sinn besta dag, séu rétt stilltir, sé von um að skáka úkraínska liðinu. Við erum þó ólíklegri aðilinn, klárlega.
Sigurinn á Ísrael – og hvernig leikurinn vannst – gæti reynst ótrúlega dýrmætur þegar fram líða stundir. Svo virðist sem ákveðin stemning sé þegar farin að myndast með karlalandsliðinu á ný, en hana hefur aldeilis vantað undanfarið. Ísland hefur ekki spilað svona mikilvægan leik síðan 2020, þegar liðið tapaði á grátlegan hátt gegn Ungverjum í eins úrslitaleik og nú er framundan. Lífið er alltaf aðeins skemmtilegra þegar landsliðinu gengur vel og spilar mikilvæga leiki. Það er þó mikilvægt að íslenska liðið sýni góða frammistöðu gegn Úkraínu, geri þjóðina stolta. Hvort það verði nóg á eftir að koma í ljós, úkraínska liðið er jú ógnarsterkt.
Leikmenn hafa sjálfir rætt það í ferðinni að liðið sé að verða samstilltara og samstillara með hverri æfingunni og hverjum leiknum sem líður. Það gefur þessum hópi, sem inniheldur mikið af ungum leikmönnum, góða og dýrmæta reynslu að vera komnir á þetta stig og berjast um sæti í lokakeppni á stórmóti.
Aukinn meðbyr sem nú þegar hefur skapast eftir sigurinn á Ísrael er eitthvað sem væri hægt að taka áfram í næstu leiki og verkefni. Það er hins vegar ekkert leyndarmál að sigur á þriðjudag og farseðilinn á EM myndi gleðja þjóðina óendanlega mikið. Það væri líka hálf súrealískt miðað við allt sem á undan hefur gengið.
Áfram Ísland.
