Félag múslima á Íslandi hefur sótt um endurnýjun á byggingarleyfi fyrir byggingu mosku á Suðurlandsbraut í Reykjavík. Af því tilefni birtir Ólafur Ísleifsson, hagfræðingur og fyrrverandi þingmaður Miðflokksins, grein í Morgunblaðinu, þar sem hann varar við fjárframlögum frá mögulega vafasömum aðilum til verkefnis af þessu tagi.
Í því samhengi vekur Ólafur máls á fordæmi um slíkt í Danmörku:
„Í Danmörku gilda frá 2021 lög um varnir gagnvart erlendum öfgaöflum sem Danir telja grafa undan dönsku samfélagi. Danskir þingmenn úr flestum stjórnmálaflokkum greiddu frumvarpi dönsku jafnaðarmannastjórnarinnar atkvæði sitt. Lögin leggja bann við því að taka við fé eða annars konar stuðningi frá erlendum aðilum sem taldir eru varasamir.“
Markmiðið sé að forðast íhlutun öfgaafla sem geti grafið undan lýðræði og mannréttindum í landinu þar sem byggingin rís. „Fréttir um fyrirhugaðar byggingarframkvæmdir í Reykjavík hafa tengingu við hinar dönsku aðstæður. Umrædd trúarbygging sýnist ekki verða að veruleika nema fjárstuðningur komi erlendis frá,“ skrifar Ólafur.
Ólafur bendir á að samkvæmt dönsku lögunum sé bannað að þiggja fjárframlög eða annan stuðning frá erlendum aðilum sem taldir eru vinna gegn dönskum hagsmunum og gildum. Segir hann dönsku samfélagi vera ógnað af myrkum öflum. Rekur hann feril þessa lagafrumvarps með þessum orðum:
„Í lögunum er hvergi minnst á trúarsöfnuði eða samkomuhús þeirra. Danskir stjórnmálamenn tala þó enga tæpitungu þegar þeir fagna samþykkt frumvarps. Haft er eftir jafnaðarmanninum Mattias Tesfaye að erlendis fyrirfinnist öfgaöfl sem leitist við að snúa múslimskum samborgurum gegn Danmörku og þar með kljúfa danskt samfélag. Hann segir fjölmiðla ítrekað hafa flutt fréttir á liðnum árum um danskar moskur sem þegið hafi háar fjárhæðir frá m.a. Mið-Austurlöndum. Þessu vilji ríkisstjórnin vinna gegn.
Kom í hlut ríkisstjórnar jafnaðarmanna að ljúka meðferð málsins á þjóðþinginu. Haft var eftir þingmönnum að formyrkvaðar ríkisstjórnir Mið-Austurlanda megi að sjálfsögðu ekki senda peninga í moskur eða kóranskóla í Danmörku til að grafa undan dönskum gildum. Þess vegna beri að fagna þessu inngripi til að stöðva árásir á lýðræðið sem stafa m.a. frá öfgafullum moskum. Aldrei verði samþykktar árásir á hið danska friðsamlega samfélag og lýðræði.“
Ólafur segir einnig að dönsk stjórnvöld láti útbúa lista yfir óæskilega aðila hvað varðar fjárframlög erlendis frá:
„Danska útlendinga- og aðlögunarráðuneytinu ber að gera lista yfir ríkisstjórnir, ríkisstofnanir eða aðra slíka sem taldir eru vinna gegn dönskum grundvallargildum um lýðræði og mannréttindi. Bann er lagt við því að þiggja fjárframlög eða annan stuðning frá slíkum aðilum. Þeir sem brjóta gegn banninu skulu greiða sekt og endurgreiða féð. Þetta eru dönsk stjórnmál í okkar samtíma. Sádi-Arabía, Katar og Tyrkland voru talin eiga greiða leið á listann ef marka má danska fjölmiðla.“
Ólafur vitnar síðan til orða nafna síns, Ólafs Ragnars Grímssonar forseta, sem hann viðhafði í viðtali við Ríkisútvarpið árið 2015 í tilefni af því að sendiherra Sádi-Arabíu hefði greint frá fyrirætlunum þarlendra stjórnvalda um að styrkja mosku-byggingu á Íslandi. Var þar haft eftir Ólafi Ragnari:
„Við erum með lög í landinu sem banna erlendum aðilum að leggja fé í stjórnmálastarf á Íslandi. Og það hefur verið breið pólitísk samstaða um slíkt bann. Og með líkum hætti finnst mér óeðlilegt að ríki eins og Sádi-Arabía skuli hafa fullt frelsi til þess að blanda sér með fjármunum og íhlutunum af hálfu sendiráðsins í trúariðkun á Íslandi.“
Ólafur Ísleifsson leggur til, í lok greinar sinnar, að Alþingi samþykki fyrir þinglok í vor sambærilegt lagafrumvarp og öðlast hefur gildi í Danmörku. Þannig verði leitast við að girða fyrir fjárframlög til moskubygginga frá erlendum aðilum sem taldir eru vinna gegn grunngildum samfélagsins, lýðræði og mannréttindum.
