Helgi Fannar Sigurðsson skrifar frá Búdapest

Albert Guðmundsson og Orri Steinn Óskarsson, sóknarmenn íslenska landsliðsins, hafa verið fremur kaldir fyrir framan markið undanfarið. Fyrrum framherjinn Kjartan Henry Finnbogason hefur þó ekki áhyggjur af þessu fyrir leik kvöldsins gegn Ísrael í umspili um sæti á EM.

„Við erum að fjalla um leikinn og verðum að pæla í einhverju og fjalla um eitthvað,“ sagði Kjartan léttur í bragði við 433.is, spurður út í þetta.

Þó Albert sé að eiga stórgott tímabil með ítalska liðinu Genoa hefur hægst á markaskorun hans undanfarið. Nánar til tekið er sóknarmaðurinn aðeins með eitt mark í síðustu átta leikjum, það kom gegn Monza fyrr í þessum mánuði.

„Albert þrífst ekkert endilega á mörkum. Hann hefur sett þau nokkur og lagt upp en svo held ég að Genoa liðið hafi kannski aðeins misst dampinn við að halda sæti sínu í deildinni,“ sagði Kjartan.

Orri, sem hefur verið að koma inn í lið FC Kaupmannahafnar undanfarið eftir að hafa verið settur út í kuldann þar áður, hefur þá ekki skorað síðan í nóvember. Það var með landsliðinu gegn Slóvakíu, en síðasta mark hans fyrir FCK kom í október.

„Orri er byrjaður að spila aftur. Við skildum ekki alveg þegar hann var settur á ís.

En landsliðið er þannig að það hefur ekki alltaf skipt máli í hvaða formi menn eru með félagsliðum sínum og vonandi heldur það áfram,“ sagði Kjartan.

Ítarlegra viðtal við Kjartan um leik kvöldsins er í spilaranum.