Íþróttavikan, sem kemur að venju út alla föstudaga, var með breyttu sniði þessa vikuna sökum landsleiks Íslands gegn Ísrael. Þáttastjórnandinn Helgi Fannar Sigurðsson er staddur í Búdapest, þar sem leikurinn fer fram og því var þátturinn tekinn upp með fjarfundarbúnaði þetta skiptið. Hrafnkell Freyr Ágústsson var á sínum stað í settinu og með þeim félögum var Hörður Snævar Jónsson.

Í kvöld er komið að leiknum gegn Ísrael en um er að ræða undaúrslitaleik í umspili um sæti á EM. Sigurvegarinn mætir svo Úkraínu eða Bosníu í hreinum úrslitaleik um sæti á mótinu.

„Ég er ekkert sérstaklega bjartsýnn, allavega ekki að við förum á EM það er að segja. Ég er ágætlega bjartsýnn á að við vinnum á morgun. En úrslit þessa liðs síðustu tvö ár hafa ekki gefið manni neina ástæðu til að vera bjartsýnn á að liðið vinni tvo leiki í röð,“ sagði Hörður.

„Frammistöðurnar undir Hareide (landsliðsþjálfara) hafa verið ágætar inn á milli en það hefur ekki verið neinn stöðugleiki og það er það sem þú þarft til að komast áfram. Það er það sem ég óttast mest, að hann verði ekki til staðar.“

Hrafnkell telur að Ísland geti vel unnið lið Ísrael.

„Veðbankar eru mjög ósammala okkur en miðað við að við mættum með C-liðið okkar síðast og gerðum jafntefli við þá er ég bjartsýnn.“