Helgi Fannar Sigurðsson skrifar frá Búdapest:

Jóhann Berg Guðmundsson leikmaður Burnley var sá eini sem mætti ekki út á æfingu íslenska landsliðsins í Búdapest í dag.

Allir hinir 23 leikmennirnir voru mættir þegar blaðamenn fengu að fylgjast með æfingu liðsins í Ungverjalandi í dag.

Ómar Smárason, upplýsingafulltrúi KSÍ segir Jóhann þó ekki glíma við nein meiðsli í samtali við 433.is.

Ísland mætir Ísrael í umspili um laust sæti á EM á fimmtudag en sigurvegari leiksins mætir Úkraínu eða Bosníu í hreinum úrslitaleik.

Að öllu óbreyttu verður Jóhann Berg fyrirliði Íslands í leiknum.