Jazzklúbburinn Múlinn heldur áfram með vordagskrá sína með spennandi tónleikum miðvikudaginn 20. mars kl. 20:00 á Björtuloftum, Hörpu með tríói píanóleikarans Kára Egilssonar.
Kári Egilsson, bassaleikarinn Nicolas Moreaux og trommuleikarinn Matthías Hemstock spila fjölbreytta efnisskrá með frumsömdum lögum ásamt sérvöldum lögum eftir aðra. Á síðasta ári gaf Kári út tvær plötur, jazzplötuna Óróapúls og poppplötuna Palm Trees In The Snow við mjög góðar viðtökur ásamt því að bera valinn bjartasta von Íslensku tónlistarverðlaunanna 2024. Ný tónlist eftir Kára verður frumflutt á tónleikunum.
Spennandi vordagskrá Jazzklúbbsins Múlans heldur síðan áfram á miðvikudagskvöldum fram í lok maí. Múlinn er að hefja sitt 27. starfsár en hann er samstarfsverkefni Félags Íslenskra Hljómlistarmanna (FÍH) og Jazzvakningar. Klúbburinn heitir í höfuðið á Jóni Múla Árnasyni sem jafnframt var heiðursfélagi og verndari Múlans. Múlinn er styrktur af Reykjavíkurborg, Tónlistarsjóðnum og SUT sjóðnum og er í samstarfi við Heimstónlistarklúbbinn og Hörpu. Jazzklúbburinn Múlinn er handhafi Íslensku Tónlistarverðlaunanna.
Tónleikar Múlans hefjast klukkan 20 og fara fram að öllu jöfnu á Björtuloftum, 5. hæð Hörpu, miðaverð 3.900 kr., 2.700 kr. fyrir nemendur og eldri borgara, miðar fást í miðasölu Hörpu, harpa.is og tix.is.
Hvað: Kári Egilsson tríó á Múlanum
Hvenær: miðvikudaginn 20. mars kl. 20:00
Hvar: Múlinn Jazzklúbbur, Björtuloft, Hörpu
