Helgi Fannar Sigurðsson skrifar frá Búdapest

Það eru þrír dagar í að íslenska karlalandsliðið spili við Ísrael í gríðarlega mikilvægum leik í undanúrslitum umspils um sæti á EM í sumar. Leikurinn fer fram hér í Búdapest, þar sem Ísland spilaði einmitt síðast leik í umspili um sæti á EM.

Leikurinn skráist sem heimaleikur Ísrael en er spilaður í Búdapest sökum ástandsins á Gasa. Strákarnir okkar spiluðu síðast í ungversku höfuðborginni árið 2020, þá gegn heimamönnum í hreinum úrslitaleik um sæti á EM. Hann fór þó ekki eins og við Íslendingar vildum og þrátt fyrir draumabyrjun með marki Gylfa Þórs Sigurðssonar á 11. mínútu átti kvöldið eftir að breytast í martröð.

Ungverjar jöfnuðu með marki Loic Nego á 88. mínútu og á annarri mínútu uppbótartíma gat örþreytt íslenskt lið ekki komið í veg fyrir að Dominik Szoboszlai, nú leikmaður Liverpool, skoraði sigurmarkið.

Vonandi verður niðurstaðan allt önnur fyrir Ísland í leiknum á fimmtudag, en sigurliðið mætir Úkraínu eða Bosníu í úrslitaleik um sæti á EM.

Það er athyglisvert að skoða byrjunarlið Íslands frá því í þessum leik en miklar breytingar hafa orðið á liði Íslands síðan. Aðeins þrír leikmenn úr byrjunarliðinu eru í hópnum sem mætir Ísrael.

Byrjunarlið Íslands gegn Ungverjum 2020
Hannes Þór Halldórsson

Guðlaugur Victor Pálsson
Kári Árnason
Ragnar Sigurðsson
Hörður Björgvin Magnússon

Jóhann Berg Guðmundsson
Rúnar Már Sigurjónsson
Aron Einar Gunnarsson
Birkir Bjarnason

Gylfi Þór Sigurðsson

Alfreð Finnbogason