Þorvaldur Þórðarson, prófessor í eldfjallafræði við Háskóla Íslands, segir að tvær sviðsmyndir séu mögulegar vegna eldgossins sem hófst milli Hagafells og Stóra-Skógfells á Reykjanesskaga á laugardagskvöld. Lítill fyrirvari var á upphafi gossins sem var mjög kraftmikið til að byrja með.

Þorvaldur segir í samtali við Morgunblaðið í dag að ein stærsta spurningin sé hvort innflæði kviku minnki eða hvort sama atburðarás og hefur verið í gangi undir Svartsengi haldi áfram.

Þorvaldur segir við Morgunblaðið:

„Það sem maður horfir núna í er hvernig framhaldið verður. Svo er spurning hvernig flæðið úr dýpra kvikuhólfi í það grynnra verður, hvort það nái jafnvægi og haldist í fjórum rúmmetrum á sekúndu. Ef það gerist þá fáum við svipaða atburðarás og var núna frá síðasta gosi, fimm til sex vikur á milli atburða. Ef innflæði úr dýpra kvikuhólfi heldur áfram að hægja á sér, þá sjáum við fyrir endann á þessu og þá lýkur þessu eftir um tvo mánuði. Þetta eru þessar tvær sviðsmyndir sem eru mögulegar en nú þarf bara að fylgjast með og sjá hvað setur,“ segir hann.

Rólegt var á gosstöðvunum í nótt og hafði RÚV eftir Bjarka Kaldalóns Friis, náttúruvársérfræðingi hjá Veðurstofu Íslands, í morgun að nær engin skjálftavirkni hafi verið við kvikuganginn í nótt. Um miðja nótt hafi virst draga úr krafti gossins en viknin sé núna svipuð og í gær og gígar að byggjast upp í gossprungunni.