Ása Guðbjörg Ellerup, hin íslenska eiginkona hins grunaða raðmorðingja Rex Heuermann, segir hann ekki færan um að fremja ódæði eins og hann er sakaður um. Hún heimsækir hann í fangelsið og segir að hann eigi að njóta vafans.
Þetta kemur fram í frétt breska blaðsins The Daily Mail.
Ása og Rex hafa verið gift í 27 ár en eru skilin að borði og sæng en eiga saman tvö börn. Mikið hefur verið fjallað um Ásu og hennar þátt í sögunni um Gilgó morðin. Ása hefur ekki verið ákærð í málinu og yfirvöld telja að hún hafi ekki haft neina vitneskju um morðin sem Rex er sakaður um.
„Ég mun taka til greina öll sönnunargögn í málinu og ekki fella neina dóma sjálf þar til í lok réttarhaldanna,“ segir Ása í yfirlýsingu sem lögmaður hennar, Robert A. Macedonio, birti í aðdraganda réttarhaldanna. Ekki liggur fyrir hvenær þau hefjast en gert er ráð fyrir að þau verði löng.
„Ég leyfi honum að njóta vafans, það eigum við öll skilið,“ segir Ása í yfirlýsingunni.
Að sögn Macedonio heimsækir Ása Rex í hverri viku í fangelsið í Suffolk sýslu, þar sem hann er vistaður. Sagði hann að Ása trúi því ekki að Rex sé fær um að fremja þau ódæði sem hann er sakaður um.
Rex er sakaður um að hafa myrt að minnsta kosti fjórar konur á margra ára tímabili og grafið þær á Gilgó ströndinni í New York, skammt frá heimili þeirra hjóna í Massapequa Park. Fórnarlömbin eru Maureen Brainard-Barnes, Amber Lynn Costello, Megan Waterman og Melissa Barthelemy, konur á þrítugsaldri sem taldar eru hafa stundað vændi.
Sagði Macedonio að Ása sendi fjölskyldum fórnarlambanna innilegar samúðarkveðjur. „Engin á skilið að deyja á þennan hátt,“ las hann upp úr yfirlýsingunni.
Mikið var fjallað um Ásu og börnin þeirra Rex í tengslum við rannsókn á heimilinu í Massapequa Park. Ofan á allt annað var greint var frá því að hún væri að glíma við mikil veikindi og húsið var svo gott sem tekið í sundur við leit að sönnunargögnum. Macedonio segir að hún og börnin búi ekki lengur í bænum.
Greint hefur verið frá því að Ása hafi samið við sjónvarpsstöðina NBC um gerð heimildarmyndar um málið. Um er að ræða tugmilljón króna samning. Fjölskyldur fórnarlambanna hafa gagnrýnt stöðina harðlega fyrir samnigninn.
