KR hefur átt í vandræðum með að gera upp bónusa við leikmenn sína frá síðustu leiktíð. Þetta herma öruggar heimildir 433.is.
Einn þeirra leikmanna sem átti inni talsverða upphæð var Sigurður Bjartur Hallsson sem gekk í raðir FH í síðustu viku frá KR.
Til að komast í gegnum leyfiskerfi KSÍ þarf félag að hafa lokið við allar greiðslur frá síðustu leiktíð.
Bjarni Guðjónsson, framkvæmdarstjóri KR vill lítið segja um málið. „Við ræðum ekki málefni einstakra leikmanna,“ segir Bjarni í samtali við 433.is.
Samkvæmt heimildum 433.is vildi Sigurður fá bónusa sína frá KR greidda áður en hann samdi við FH, hafði þetta komið upp í samtali hans og aðila tengdum honum við þau félög sem höfðu áhuga á Sigurði.
Heimildir 433.is herma að fleiri leikmenn en Sigurður hafi átt í vandræðum með að fá bónusana frá síðasta tímabili greidda og hefur þetta verið rætt á meðal leikmanna liðsins.
Einhverjum þykir það furðulegt að KR sé að sækja stór nöfn á leikmananmarkaðinn þegar ekki er búið að ganga frá greiðslum síðasta tímabils.
KR hefur í vetur samið við Aron Sigurðarson, Alex Frey Hauksson og Axel Andrésson sem allir eru að koma heim úr atvinnumennsku. Þá hefur félagið samið Guy Smit um að verja mark liðsins í sumar en KR spilar undir stjórn Gregg Ryder.
