Orðið á götunni er að Sigríður Andersen, sem nú hefur sótt um starf ráðuneytisstjóra fjármálaráðuneytisins, komi ekki til greina og verði sér einungis til enn frekari minnkunar með því að sækja um. Ljóst er að hæfir embættismenn eru meðal umsækjenda, fólk sem útilokað er að ganga fram hjá – ef allt er með felldu.
Landsmenn eru fljótir að gleyma. Því er rétt að rifja upp að Sigríður Andersen var hrakin úr embætti dómsmálaráðherra eftir embættisafglöp sem kostuðu íslenska ríkið mikla fjármuni. Hún var einnig í lykilhlutverki þegar ríkisstjórn Bjarna Benediktssonar féll að óþörfum árið 2017 eftir 10 mánaða starf. Ástæðan var sú að Sigríður hélt upplýsingum frá öðrum ráðherrum en hún var dómsmálaráðherra og fékk inn á sitt borð erfið mál sem tengdust fjölskyldu Bjarna Benediktssonar. Þegar ráðherrar samstarfsflokkanna komust að því að Sigríður hafði leynt mikilvægum upplýsingum sprakk ríkisstjórnin. Vitanlega var það óþarfi en Sigríður Andersen klúðraði því sem þurfti til að upp kom trúnaðarbrestur sem hafði þessar afleiðingar.
Í kjölfarið var boðað til þingkosninga sem leiddu af sér þá skelfilegu vinstri stjórn Katrínar Jakobsdóttur sem enn hangir í valdastólum. Upphafið var hjá Sigríði Andersen og með því sannast að oft veltir lítil þúfa miklu hlassi. Sigríður hélt þó velli um sinn en var síðan hrakin úr vinstri stjórninni að kröfu Vinstri grænna. Í prófkjöri sjálfstæðismanna árið 2021 var henni hafnað. Síðan þá hefur hún reynt fyrir sér í lögmennsku og einnig knúið dyra hjá flokknum um bitling. Sjálfstæðisflokkurinn varð við því og valdi Sigríði Andersen til setu í bankaráði Seðlabanka Íslands þar sem hún situr nú. Orðið á götunni er að með því hafi flokkurinn fullgreitt Sigríði Andersen það sem hún kann að hafa átt inni hjá Sjálfstæðisflokknum.
Sumir virðast hins vegar enga sómakennd hafa. Frægt er þegar Guðni Th. Jóhannesson, forseti Íslands, spurði Davíð Oddsson í kosningasjónvarpi fyrir forsetakosningarnar árið 2016 hvort hann hefði enga sómakennd. Þá hafði Davíð ráðist að Guðna með ómerkilegu skítkasti sem bar ættareinkenni skrímsladeildar Sjálfstæðisflokksins (þar sem Hannes Hólmsteinn og Andrés Magnússon hafa verið í forsvari). Guðni svaraði með þunga og spurði svo: „Davíð, hefur þú enga sómakennd?“
Hinn orðhvati baráttumaður Davíð átti engin svör við þessu. Hann náði þó 13 prósenta fylgi í forsetakosningunum og fjórða sæti en Guðni 40 prósentum og sigraði.
Orðið á götunni er að Sigríður Andersen hafi enga sómakennd láti hún sér það raunverulega til hugar koma að einhver gæti forsvarað að skipa hana í embætti ráðuneytisstjóra.
Orðið á götunni er að gangi Sjálfstæðisflokkurinn svo langt fram á brúnina að skipa Sigríði í embætti ráðuneytisstjóra fjármála-og efnahagsráðuneytisins þá yrði það fyrsta verk næsta fjármálaráðherra eftir kosningar að setja hana af. Það eru takmörk fyrir öllu þótt Bjarni Benediktsson eigi stundum erfitt með að skilja það. Hingað til hefur skipan Svanhildar Hólm í sendiherrastöðu í Washington þótt toppa allt í dómgreindarbresti við skipan í embætti. Varla hyggst Þórdís Kolbrún Reykfjörð Gylfadóttir, fjármálaráðherra, slá forvera sínum við í spillingarskipunum í embætti.
