Það eru rétt rúmir tuttugu dagar í það að Besta deild karla fari af stað með látum, Víkingar hafa titil að verja en mörg lið telja sig geta barist við besta lið landsins í sumar.

Þótt ótrúlegt sé hefur engum leikmanni tekist að ógna markametinu á síðustu tveimur árum þrátt fyrir að búið sé að lengja tímabilið um fimm leiki.

Markametið er 19 mörk en það eru þeir Andri Rúnar Bjarnason, Tryggvi Guðmundsson, Þórður Guðjónsson, Pétur Pétursson og Guðmundur Torfason sem eiga það met.

Vonir standa til um að einhver af framherjum deildarinnar geti bætt þetta met í sumar. Hér að neðan eru sex leikmenn sem gætu gert það.

Emil Atlason (Stjarnan)
Ef Emil helst heill er ansi líklegt að hann ógni markametinu og taki gullskóinn. Hefur raðað inn mörkum síðustu ár.

Benóný Breki Andrésson (KR)
Ætti að verða í miklu stærra hlutverki en á síðustu leiktíð, var öflugur þegar leið á mótið og ætti að geta ógnað markametinu í sumar.

Benjamin Stokke (Breiðablik)
Skoraði mikið í næst efstu deild Noregs á síðustu leiktíð og Blikar setja allt traust á það að hann haldi því áfram,

Patrick Pedersen (Valur)
Skoraði sjö mörk í 14 leikjum á annari löppinni í fyrra en ætti að geta skorað meira í ár. Hefur verið heill heilsu í allan vetur.

Nikolaj Hansen (Víkingur)
Skoraði sextán mörk fyrir þremur árum í 21 leik og þarf að finna þá markaskó í ár til að geta keppt um gullskóinn.

Andri Rúnar Bjarnason (Vestri)
Einn af þeim sem á markametið í efstu deild, er líklegur til þess að draga vagninn í markaskorun fyrir Vestra og gæti verið á meðal efstu manna ef allt heppnast.