Stjörnufræðingar telja að fyrstu vetrarbrautirnar hafi myndast í kringum risastóra bauga af hulduefni. En nýfundin vetrarbraut, sem myndaðist fyrir rúmlega 13 milljörðum ára, gæti gjörbreytt þessari kenningu og gjörbylt heimsfræðinni.

Með aðstoð James Webb geimsjónaukans fundu stjörnufræðingar vetrarbraut, sem hefur fengið heitið ZF-UDS-7329, sem á eiginlega ekki að vera til. Tilvist hennar gengur þvert gegn viðteknum kenningum heimsfræðinnar.

Þetta kemur fram í nýrri rannsókn sem hefur verið birt í vísindaritinu Nature. Í henni kemur fram að í vetrarbrautinni séu fleiri stjörnur en í Vetrarbrautinni, þrátt fyrir að hún hafi myndast aðeins 800 milljónum árum eftir að alheimurinn varð til. Þetta þýðir að stjörnurnar mynduðust án þess að hulduefni væri til staðar en það gengur þvert gegn viðteknum kenningum um myndun vetrarbrauta.

Ekki er vitað hvernig stendur á þessu en þessi nýja uppgötvun gæti gjörbylt hugmyndum okkar um hvernig fyrsta efnið í alheiminum myndaðist og jafnvel grunnhugmyndum heimsfræðinnar.

Live Science segir að í tilkynningu frá Claudia Lagos, meðhöfundi rannsóknarinnar,  komi fram að það að svo gríðarlega massífar vetrarbrautir hafi myndast á árdögum alheimsins, sé ákveðin áskorun hvað varðar viðteknar hugmyndir okkar og kenningar í heimsfræði. Ástæðan er að þegar vetrarbrautin myndaðist þá höfðu gríðarlegar stórir hulduefnishlutir ekki myndast því þeir höfðu einfaldlega ekki haft nægan tíma til þess frá myndun alheimsins. Talið er að hulduefni sé nauðsynlegt til að halda vetrarbrautum saman í upphafi.