Nýlega handtók þýska lögreglan Daniela Klette, sem hafði verið eftirlýst fyrir hryðjuverk áratugum saman, í Berlín. Þar bjó hún í eins herbergis íbúð. Þrátt fyrir að íbúðin sé lítil þá hefur lögreglan nú þegar ekið fimm stórum flutningabílum, með haldlögðum munum, á brott.

Der Spiegel skýrir frá þessu og segir að meðal þess sem fannst í íbúðinn séu 1,2 kg af gulli. Verðmæti þess er talið vera sem nemur um 11 milljónum íslenskra króna.

Í skáp, með tvöföldum botni, fundust sem svarar til sex milljóna íslenskra króna í reiðufé. Þess utan fundust skotvopn og skotfæri í íbúðinni.

Talskona lögreglunnar vildi ekki tjá sig um þetta þegar Bild leitaði hennar og sagði aðeins að vegna rannsóknarhagsmuna tjái lögreglan sig ekki um hvað fannst.