Bretland er víti til varnaðar vegna þess að minnkandi fjárfesting breskra lífeyrissjóða í breskum hlutabréfum hefur veikt mjög hlutabréfamarkaðinn í Bretlandi og ógnar jafnvel bresku fjármögnunarumhverfi og efnahagslífi. Mikilvægt er að skoða stóra samhengið og stíga varlega til jarðar þegar teknar eru ákvarðanir um breytingar á fjárfestingarheimildum íslenskra lífeyrissjóða. Skuldabréfamarkaðurinn hér á landi er til fyrirmyndar á heimsvísu. Magnús Harðarson, forstjóri Kauphallarinnar, er gestur Ólafs Arnarsonar í hlaðvarpi Markaðarins á Eyjunni.

Markaðurinn - Magnus Hardarson - 6.mp4

„Víti til varnaðar sem við höfum bent á er t.d. breski markaðurinn. Það hefur grafið undan honum. Eitt af því er nú Brexit þó að ég ætli ekki a halda því fram að það sé eina ástæðan,“ segir Magnús.

„Greinendur í Bretlandi hafa líka verið að benda á hversu gríðarleg breyting hefur orðið á fjárfestingu breskra lífeyrissjóða í breskum hlutabréfum á síðasta aldarfjórðungi. Hún hefur minnkað alveg gríðarlega og greinendur þar hafa bent á að þetta hafi veikt breska markaðinn alveg gríðarlega. Breskir stjórnmálamenn hafa þar með líka áhyggjur af því að þetta fari að grafa undan bresku efnahagslífi, svo ég vísi nú alltaf í þessu óbeinu áhrif af hlutabréfamarkaðnum, eins og ég var að tala um áðan, á allt fjármögnunarumhverfið í landinu.“

Hann bendir á að við verðum að hafa í huga, þegar velt sé fyrir sér og ákvarðanir teknar um fjárfestingarheimildir lífeyrissjóðanna, hverjar afleiðingarnar geti orðið. „Þetta er ekki alveg einfalt úrlausnarefni og ákvörðun sem við tökum í dag, og finnum ekkert fyrir á morgun, getur haft gríðarleg áhrif árið 2050. Við verðum að stíga varlega til jarðar og skoða stóru myndina. Ég myndi alltaf tala fyrir varfærnum skrefum til breytinga og að menn hugi að langtímaáhrifum jafnt sem skammtímaáhrifum.“

Hér hefur gengið vel, þótt hægt hafi farið af stað, að byggja aftur upp hlutabréfamarkað eftir hrunið. Kannski ætti frekar að tala um verðbréfamarkað vegna þess að það er einn mikilvægur eignaflokkur sem heitir skuldabréf.

„Já, gott að þú nefnir það. Ég myndi segja að íslenski skuldabréfamarkaðurinn er að mínu mati, þegar kemur að virkni og gagnsæi, til fyrirmyndar á Evrópu- ef ekki heimsvísu. Hér eru virk og góð viðskipti.“

Og þetta er náttúrlega ekki síður mikilvægur markaður vegna þess að almennt er það nú í gegnum skuldabréfamarkað sem fyrirtæki ná sér í fjármagn.

Nákvæmlega. Út frá ríkisskuldabréfum myndast einhver grunnávöxtunarkrafa. Þarna eru bæði fyrirtæki og sveitarfélög líka og þetta er eignaflokkur sem almenningur á mikið í, ekki kannski beint en töluvert í gegnum sjóði.“