Stafrænu markaðsstofurnar Sahara og Svartigaldur hafa báðar hlotið Premier Partner viðurkenninguna frá Google árið 2024. Þetta er mikil viðurkenning fyrir báðar stofurnar.

Google Premium Partners fá viðurkenningu fyrir að hámarka árangur í herferðum fyrir viðskiptavini gegn því að auka virði og vöxt viðskiptavina og með því sýna fram á færni og sérfræðikunnáttu í Google Ads.

„Við höfum unnið markvisst að því að fá þessa viðurkenningu frá Google síðustu árin, en aðeins 3% af Google Partners hljóta viðurkenninguna Premier Partner ár hvert í heiminum. Viðurkenningin er einnig merki um það traust sem viðskiptavinir hafa veitt okkur í þessari vegferð og því var mikil ánægja þegar hún var í höfn,“ segir Andreas Aðalsteinsson, Partner og yfirmaður stafrænnar deildar Sahara.

Þetta er ekki einungis viðurkenning heldur hefur þetta ýmsa kosti í för með sér, bæði fyrir stofurnar og viðskiptavini þeirra. Má þar helst nefna aðgang að nýjum vörum hjá Google áður en þær fara opinberlega í loftið, aukinn stuðning frá sérfræðingum Google og aðgang að viðburðum á vegum Google.

„Þetta er mikil viðurkenning fyrir okkur hjá Sahara, bæði fyrir fyrirtækið og þá frábæru starfsmenn sem starfa hjá fyrirtækinu. Viðurkenningin gefur ákveðna staðfestingu á þann metnað sem við setjum í verkefnin okkar, og mun þannig styrkja ásýnd fyrirtækisins hér heima og erlendis,“ segir Sigurður Svansson, framkvæmdastjóri Sahara.