Leyniþjónusta úkraínska hersins, HUR, tilkynnti í gær að hún hefði staðið fyrir velheppnaðri netárás á rússneska varnarmálaráðuneytið. Hafi úkraínskum sérfræðingum tekist að fá aðgang að ýmsum upplýsingum og miklu magni trúnaðarskjala.

Meðal þessara skjala eru fyrirmæli, skýrslur og önnur skjöl sem voru send til rúmlega 2.000 deilda innan rússneska hersins.

„Tölvusérfræðingar HUR, sem heyrir undir úkraínska varnarmálaráðuneytið, gerðu enn eina árangursríka netárás gegn Rússlandi. Árásin gerði okkur kleift að komast inn á netþjóna varnarmálaráðuneytisins,“ skrifaði HUR á Telegram og bætti við að þær upplýsingar sem var aflað með þessu geri Úkraínumönnum betur kleift að kortleggja uppbyggingu rússneska hersins.