Forsetaframbjóðandinn og björgunarsveitarmaðurinn Tómas Logi Hallgrímsson tekur þátt í mottumars. Það gerir hann til að styðja mikilvægt starf Krabbameinsfélagsins, enda snertir krabbamein okkur öll.

„Krabbamein snertir okkur öll og því miður getur einn af hverjum þremur Íslendingum reiknað með því að greinast með krabbamein einhvern tímann á ævinni. Það er með stærstu áskorunum sem fólk stendur frammi fyrir, bæði þeir sem veikjast og þeirra nánustu.

Ég vil gera mitt til þess að styðja við bakið á þeim sem þurfa að takast á við krabbamein, og beita mér gegn krabbameinum. Og við getu náð enn meiri árangri! Þess vegna ákvað ég að safna fyrir Krabbameinsfélagið.

Hvert og eitt okkar getur ekki breytt miklu en ég treysti Krabbameinsfélaginu til að vinna áfram af krafti til að bæta lífslíkur og lífsgæði fólks sem veikist af krabbameinum og koma í veg fyrir þau. Það gerir félagið með krabbameinsrannsóknum, með ráðgjöf og stuðningi, fræðslu og forvarnarvinnu.

Ég vil hjálpa til við það og býð þér að vera með mér! Saman erum við ennþá sterkari. Með stuðningi við félagið leggjum við okkar af mörkum til þess að ná enn betri árangri í baráttunni við krabbamein hér á landi. Hver króna skiptir máli. Bestu þakkir fyrir stuðninginn.“

Söfnunina má styrkja hér og þeir sem vilja leggja framboði Tómasar lið geta fundið nánari upplýsingar á Facebook-síðu framboðsins.